සඳ

වැඩ ඇරී
එයි සඳ
දුම් වලාකුළු අතරින්
කිරණ දෑතින්
ගෙදර අහසේ කළුවර අහුමුලු
අතුගගා
ශුද්ධ කරමින්


වැඩ වැඩි දාට
ටාගට් කළුවර පිරී
අව අටවක වෙයි
වකුටුවී වකුටුවී වුව
එළිය දෙයි

ඇනුම්බැනුම් රාහු ආ දාට
පැළි හදවත
අමාවක වෙයි
ඒත් ආයෙත් පහුවදා
වටකුරුවට
අහස පුරා පායයි

දරුවන් හොඳින් නම්
පුන් සඳක් වෙයි
උළා රන් වන් පාට
මුහුණුවල
කෙමෙන් බැස යයි

බඩේ
සස කළලය තියාගෙන
නතර නොවී
ජීවිතය වටා
භ්‍රමණය වෙයි
සහසක් තරු මැඳ
පරණ චීත්තය ඇඳගෙන




Samitha B. Atuwabendela